ஒற்றனின் வருகை

இடைநின்று ஊடாடும் காற்றாக

சரித்திரப் பக்கங்களில் இடைச்செருகலாக

தலைநீட்டி வாழ்ந்து ஓய்ந்தவன் அவன்

மந்திராலோசனை அரங்கேறும் அரண்மனையின்

அந்தரங்க இடங்களில் நின்றிருக்கும் தூணாகிச்

செவிவழி புகும் ஏவல்களை ஏற்றுச் செயலாற்றியவன்

மக்கட்திரளில் நுழைந்து கலந்து

வெயிலில் அலைந்து திரிந்து

குவியும் தகவல்களில் உண்மைகளை மட்டும்

சல்லடைபோலும் சலித்துத் திரட்டி

இரகசியாய்ச் சுமந்து வந்தவன் அவன்

புராதனச் சாம்பலிலிருந்து எழுந்து

காலத் திரைச்சீலை விலக்கி

நவீனங்களால் நனையும்

குளிர்சாதன அறைக்குள் நுழைந்து

கடலையைக் கொறிக்கத் தொடங்குகிறான்

கண்முன்னே ஒளிரும் கணினித் திரையை

மக்கட்திரளெனக் கற்பனை செய்கிறான்

உண்மைகளையும் பொய்களையும் பிசைந்து

புதிய கலவையை உருவாக்கித் தன்னை வியக்கிறான்

அறைச்சுவரில் காது வைத்துக்கேட்டு

அதிலிருந்து கசியும் ஒலியை மொழிபெயர்க்கிறான்

தன் அனுமானங்களையும் ஆரூடங்களையும் கலந்து

புதிய தகவலைக் கண்டுபிடித்ததாய்ப் பூரிக்கிறான்

அறைக்குள் வந்துபோவோரின் பேச்சொலியிலிருந்து

தரவுகளைச் சேகரிக்கிறான்

சொல்லப்படுகிறது நம்பப்படுகிறது அறியப்படுகிறது

போன்ற சொற்களால் தன் முகம் மறைக்கிறான்

திரைமறைவிலிருந்து யார் யாரோ இடும்

யார் யாரோ கொண்டு வரும் கட்டளைகளை

மறுக்கவியலாது கைகுலுக்கி வரவேற்கிறான்

இவன் கண்ணிற்படுவானா எனப் பலரும்

காத்திருக்கிறர்கள் உங்களைப்போலவே

கோபங்கலந்த சொற்களைச் சேகரித்தவாறு