பழகு

ஆயுள் நீளும் ரகசியம்
சிரிக்கப் பழகு

பிடித்துத் தள்ளும் தோல்வி
செரிக்கப் பழகு

உலுக்கி எடுக்கும் துரோகம்
சகிக்கப் பழகு

இடறச் செய்யும் தடைகள்
உடைக்கப் பழகு

எங்கும் மாறுவேடப் புருசர்கள்
நடிக்கப் பழகு

கோபம் தூண்டும் சொற்கள்
அடக்கப் பழகு

அன்பைத் தேடும் இதயம்
அணைக்கப் பழகு

உன்னைப் பிணிக்கும் புன்மை
புதைக்கப் பழகு

எங்கும் முளைக்கும் சவால்
போராடப் பழகு

நீளும் ஏழைக் கைகள்
கொடுக்கப் பழகு

வழியில் தடுக்கும் எருமை
கடக்கப் பழகு

சுற்றிச் சந்தை இரைச்சல்
தனிமைக்குப் பழகு

உன்னில் விழிக்கும் மிருகம்
அடக்கப் பழகு

அவிழும் இயற்கை அழகு
ரசிக்கப் பழகு

இனத்தின் ஈனச் செயல்கள்
முடிக்கப் பழகு

காடு மண்டும் தளைகள்
அறுக்கப் பழகு

காதில் ஈயச் சொற்கள்
பொறுக்கப் பழகு

பொதுமையில் மறையும் தமிழன்
தமிழனாகப் பழகு

மனிதன் திறந்த புத்தகம்
படிக்கப் பழகு

உன்னை மிதிக்கக் கால்கள்
பொங்கப் பழகு