உச்சத்தை அடைந்தவன்

கேமராக்கள் கண்விழித்து

தலைநிமிர்ந்து உற்றுப் பார்த்தன

ஒலிபெருக்கிகள் உயிர்பெற்று

முன்நகர்ந்து நெருங்கின

எழுதுகோல்கள் தலைகுனிந்து

சின்னக் குறிப்பேடுகளோடு

இணைசேர்ந்தன

புன்னகை அணிந்த இதழ்கள்

நிமிர்ந்த மேனி

கனிவான பார்வை

கலையாத கேசம்

கம்பீர நடை

காற்றை விசாரிக்கும் கைகள்

உற்சாகத்தில் நனைந்து

உச்சத்தை அடைந்தவன் வந்தபோது

கண்கள் மொய்த்தன

கடந்துபோகும் கணங்கள் கனமாயின

பரபரப்பாய்க் கால்கள் நெருங்கின

வாயிதழ்கள் அசைந்து

சொற்கள் உயிர்ப்பிக்க

கேள்விகளுக்கு அழகழகாய்ப்

பதிலளிக்கத் தொடங்கினான்

இடையிடையே

வெற்றியின் தருணங்களை

எதிர்நோக்கும் சவால்களை

எதிர்காலத் திட்டங்களை

மனத்தில் ஆசைகளை

ஒவ்வொன்றாக விவரிக்கத் தொடங்கினான்

செய்திகளுக்கான தகவல் சேர்ந்தவுடன்

எல்லாமும் விடைபெறத் தொடங்கிய பொழுதில்

நான் நெருங்கினேன்

யாரிடமும் காட்டாமல் மறைத்துவிட்ட

அவனின் ஆறாத காயங்களை

மறையாத தழும்புகளை

காயாத கண்ணீர்ச் சுவடுகளை

பொல்லாத இடறிய நொடிகளை

சொல்லாத சோகங்களை

நான் சேகரித்துக்கொண்டு வந்தேன்